Вардар 1961 е на само еден бод од нова шампионска круна во македонската Суперлига, откако во 6. коло од плеј-офот пред својата публика славеше над Алкалоид со 30-27.
Дерби пресметката во СЦ „Јане Сандански“ имаше и свечен карактер, бидејќи вардарци го прославија својот 65. роденден, а победата само ја зголеми атмосферата на трибините.
Натпреварот започна израмнето, со игра гол за гол во првите минути, но постепено Вардар ја презеде контролата. Во првото полувреме клучна улога имаше голманот Милош Валах, кој со неколку важни интервенции му овозможи на домаќинот да се одлепи и на одмор да замине со предност од 17-14.
Во вториот дел, Вардар прв стигна до повисока разлика (20-15), што му даде комфор во текот на натпреварот. Иако Алкалоид во финишот успеа да ја намали разликата, не успеа да направи комплетен пресврт, па бодовите останаа во Скопје.
Најдобар стрелец кај победникот беше Јака Малус со 8 погодоци, додека Валах запиша 14 одбрани. Кај Алкалоид, Ненад Костески постигна 6 гола, а голманите Галевски и Кизиќ имаа солидни интервенции.
Со оваа победа, Вардар има 54 бода, додека второпласираниот Еурофарм Пелистер заостанува со 44 и натпревар помалку против Тиквеш. Во игра се уште осум бодови, а токму следното коло носи директен дуел меѓу двата најголеми ривали.
Пресметката меѓу Вардар и Пелистер во Скопје може да биде решавачка за титулата, бидејќи домашниот тим со победа и математички ќе ја завери шампионската круна.
