Еурофарм Пелистер продолжува да го гради тимот врз стабилни темели, откако најдобриот македонски голман Никола Митревски потпиша нов договор со клубот.
Искусниот чувар на мрежата се обврза на соработка за сезоната 2026/27, со опција истата да биде продолжена и за сезоната 2027/28.
Од клубот истакнуваат дека задржувањето на Митревски е повеќе од спортска одлука, нагласувајќи дека вредностите кои тој ги носи се клучни за иднината на тимот.
Митревски важи за еден од столбовите на македонската репрезентација, но и вистинско „дете на клубот“, кој зад себе има повеќе од две децении врвен ракомет. Низ кариерата настапуваше за Вардар, Металург, Констанца, Бенфика и Порто, освојувајќи трофеи каде и да брани.
Во Битола, пак, неговото присуство има посебна тежина, бидејќи, како што велат од клубот, најголемо задоволство е кога успесите се споделуваат со „своите“.
Очекувањата се дека Митревски и во наредниот период ќе биде еден од главните носители на играта и лидер во соблекувалната на Пелистер.
Со ова продолжување, актуелниот шампион испраќа јасна порака дека континуитетот и клупските вредности остануваат приоритет и во наредните сезони.
