Во пресрет на дерби натпреварот против Еурофарм Пелистер во Битола, десниот бек на Охрид- Давид Савревски, за Спортска Мрежа го најави претстојниот предизвик.
По напорниот период зад себе, во кој „гладијаторите“ одиграа два тешки натпревари против Олимпијакос во рамки на ЕХФ Купот, тимот сега се насочува кон важен дуел во домашното првенство, кој може да има големо значење во трката за врвот на табелата.
Савревски очекува тежок и неизвесен натпревар во Битола, нагласувајќи дека густиот распоред и напорните натпревари се предизвик, но дека токму ваквите дерби дуели носат дополнителна мотивација. Според него, клучот за добар резултат ќе биде во дисциплината, фокусот и цврстата игра.
„Нè очекува многу тежок и неизвесен натпревар пред полна сала во Битола. Ние сме во густ распоред и имавме напорни натпревари, но вакви дерби- мечеви носат посебна мотивација. Очекувам борбена и цврста игра, а клучно ќе биде да останеме фокусирани и дисциплинирани за да дојдеме до резултатот што го посакуваме.”- изјави Савревски за Спортска Мрежа.
Јасно е дека Охрид ќе мора да одигра на високо ниво за да парира на мотивираниот Пелистер, а дербито во Битола ветува неизвесна и жестока битка за важни бодови во Супер лигата.
Натпреварот се игра во среда, 08.04.2026, со почеток од 18:00 часот, во салата „Боро Чурлевски“ во Битола.
