Македонскиот шампион Еурофарм Пелистер продолжува со засилувањата за иднината, откако го обезбеди потписот на македонскиот репрезентативец Мартин Серафимов.
Десниот бек на националниот тим потпиша двегодишен договор со битолскиот клуб и од сезоната 2026/27 ќе му се стави на располагање на стручниот штаб.
Официјалната промоција на Серафимов во дресот на „пелистерци“ е најавена за јули, пред почетокот на летните подготовки.
Серафимов во Битола пристигнува од редовите на Алкалоид, а во својата кариера настапуваше и за Металург. Со неговиот ангажман, клубот добива дополнителен квалитет и искуство во бековската линија.
Од таборот на Еурофарм Пелистер потенцираат дека секој потпис на македонски репрезентативец има посебна тежина, имајќи предвид дека клубот традиционално дава значаен придонес во успесите на националниот тим.
Ангажманот на 26-годишниот ракометар се смета за инвестиција во иднината, со очекувања дека Серафимов ќе остави силен белег во тимот и ќе биде важен дел од амбициите на клубот во наредниот период.
