ГРК Охрид е на чекор до историски пласман во полуфиналето на ЕХФ Европскиот куп, но пред „гладијаторите“ е уште една тешка задача – реваншот против Олимпијакос, во кој ќе треба да ја потврдат предноста од првиот натпревар.
Капитенот Гоце Ојлески потенцира дека тимот одиграл тежок натпревар во Атина и дека, и покрај предноста, реваншот нема да биде нималку лесен. Тој предупредува дека Олимпијакос е искусен и квалитетен противник кој сигурно ќе се обиде да направи промени во играта и да изненади.
„Одигравме тежок меч во Атина, но имаме и неколку повредени играчи. Натпреварот во сабота нема да биде лесен. Олимијакос е искусна и квалитетна екипа, со квалитетни играчи, кои сигурно ќе пробаат да променат од првиот меч нешто во играта, да не изненадат и не се откажани од пласманот понатаму.“
Ојлески упатува и повик до публиката да ја исполни салата и да создаде вистинска атмосфера, нагласувајќи дека единството и поддршката ќе бидат клучни за остварување на целта.
„Ги повикувам сите љубители на ракометот, да дојдат и да ни дадат поддршка, тоа да биде прав спектакл и се надевам ќе го оствариме тоа што ни е зацртано. Мора да останеме сплотени и заедно да оствариме успех за нашиот клуб“- вели Ојлески.
Со предност од пет гола, но и со свесност за предизвикот што следи, Охрид ќе мора да одигра уште еден зрел натпревар. Поддршката од трибините и заедништвото може да бидат пресудни во битката за историски успех.
