ГРК Охрид е на чекор до најголемиот успех во клупската историја на европската сцена, откако со победата од 31-26 во Атина направи огромен исчекор кон полуфиналето во ЕХФ Европскиот куп. Сепак, пред „гладијаторите“ е најважниот предизвик – реваншот во „Билјанини извори“, каде ќе треба да ја потврдат предноста против Олимпијакос.
Тренерот Борис Ројевиќ предупредува дека предноста од пет гола не смее да создаде лажно чувство на сигурност, посочувајќи дека ваквата разлика во ракометот може брзо да се анулира. Како пример ја наведува ситуацијата од минатата сезона, кога Олимпијакос успеал да надомести негатива во сличен двомеч.
„Ништо не е готово, гледам дека во јавноста се смета дека се е готово, но пет голови се стигнуваат многу лесно и брзо. Морам да дадам пример од минатата сезона, кога Олимпијакос победи кај Турда со пет гола на гости, дома загуби четири. Ова е опасен резултат…“
Ројевиќ дополнително укажува на проблемите со повреди и замор во тимот, нагласувајќи дека краткиот ростер и згуснатиот распоред влијаат на подготовките. Сепак, верува дека клучот ќе биде во енергијата на теренот и поддршката од трибините.
„…бидејќи ние имаме и четворица повредени ракометари, нашите тренинзи не се како минатата недела, па ќе ни треба голема поддршка, не само од Охрид, туку и од цела Македонија за да се пласираме во полуфиналето. Немаме за жал преширок ростер, десетина ракометари го изнесуваат товарот и се гледа замор кај нив, па невозможно беше во шест дена да одиграме три меча со цела сила и две патувања во Атина и Скопје и затоа не игравме вчера со полн состав. Се надевам дека здравствениот билтен ќе биде добар утре и дека ќе можеме комплетни да играме против Олимпијакос. Тие сигурно ќе пробаат да сменат нешто во својата игра, но сметам дека клучно за пласманот понатаму ќе биде кој ќе има подобра енергија во овој меч. Се надевам дека полната сала ќе им даде ветар во грб на моите играчи“, изјави Ројевиќ на денешниот прес за новинари.
Охрид ја има предноста, но и сериозен предизвик пред себе. Во натпревар во кој ќе решаваат детали, енергија и поддршка од трибините, „гладијаторите“ ќе се обидат да ја довршат работата и да испишат нова страница во клупската историја.
