Утре на Градскиот стадион во Радовиш ќе се одигра исклучително важен натпревар од 23. коло во Втората лига, каде Детонит Плачковица ќе го пречека тимот на Кожуф во битка за директен опстанок.
За домашниот состав, овој натпревар има огромно значење – победата е императив доколку сакаат да се задржат во зоната која обезбедува директен опстанок. Секој друг исход значително ќе ја искомплицира ситуацијата за тимот од Радовиш во завршницата од сезоната.
Од друга страна, Кожуф доаѓа со јасна цел – три бода кои би ги доближиле на само минус три од Детонит Плачковица, односно до позициите што водат кон сигурен опстанок. За гостите ова е можеби последната шанса да останат во трката за избегнување на баражот.
Токму затоа, овој дуел со право го носи епитетот дерби за директен опстанок, каде влогот е огромен, а притисокот на двете страни максимален. Очекувањата се за неизвесен натпревар, борба за секоја топка и во борбата за трите бодови.
Ова ќе биде дуел на двајца штипски тренери – Горан Здравков и Иван Варадиновски, со тоа што Варадиновски се враќа на теренот каде работеше како тренер неколку години со Детонит Плачковица, па се враќа во добро позната средина.
Натпреварот започнува во 15:30 часот.
