Младиот кикбоксер Михаил Бошковски доби признание од Општина Кичево за својот голем спортски успех, откако градоначалникот д-р Александар Јовановски организираше средба со талентираниот спортист и му додели плакета.
Иако има само 9 години, Михаил веќе го носи епитетот шампион во кик бокс. Тој потекнува од Кичево и настапува за клубот „TITAN PRO“ Скопје, каде што ги прави своите први, но многу успешни чекори во овој спорт.
На Националното кик бокс првенство, кое се одржа на 1 март 2026 година во СРЦ „Јане Сандански“ во Скопје, младиот борец освои златен медал, покажувајќи голема борбеност, дисциплина и талент.
Бошковски триумфираше во категоријата до 33 килограми (деца), во дисциплината Кик лајт, а борбата ја заврши со убедливо водство, со што уште еднаш го потврди својот потенцијал.
Од Општина Кичево истакнаа дека се горди на младите спортисти кои со својата посветеност и љубов кон спортот претставуваат вистински пример за младите генерации, а на Михаил му посакаа уште многу успеси, медали и победи во иднина.
