Дербито меѓу Охрид и Алкалоид во плеј-офот од Супер Лигата заврши без победник, откако двете екипи одиграа 28-28 во салата „Билјанини извори“. Натпреварот донесе голема борба и неизвесност до самиот крај, а бодовите на крајот беа поделени.
Ракометарот на Охрид, Реј Моралес, во изјава за Спортска Мрежа, истакна дека натпреварот бил исклучително тежок и дека неговиот тим чувствувал голем притисок поради важноста на средбата. Според него, тоа се почувствувало и во играта, особено во првото полувреме, но во вториот дел тимот влегол многу поконцентрирано. Сепак, Моралес нагласи дека Алкалоид е исклучително силен противник против кој дури и максималниот ангажман не гарантира успех.
„Ова беше многу тежок натпревар. Беше многу важен за нас и тоа создаде притисок со кој не се справивме најдобро во првото полувреме. Во второто полувреме почнавме многу пофокусирано, но Алкалоид е многу силна екипа и дури и кога ќе дадеш 200% од себе, успехот не ти е загарантиран.“- изјави Моралес за Спортска Мрежа.
По ремито во „Билјанини извори“, Охрид и понатаму останува во трката за висок пласман во плеј-офот од Супер Лигата. До крајот на сезоната ги очекуваат уште неколку важни натпревари во кои секој бод може да биде од големо значење во борбата за позициите на табелата.
