Младиот македонски тенисер Марко Алексовски ја оправда улогата на прв носител и триумфираше на турнирот во Солун за играчи до 16 години од категорија 3. Во финалниот меч тој го совлада Игор Периќ од Србија со 2:0 во сетови (6:4, 7:5).
Алексовски на патот до титулата имаше одлични настапи. Во првото коло беше слободен, а најтежок меч одигра во второто коло кога по пресврт го совлада Константинос Антониу од Грција со 2:1 во сетови (4:6, 6:3, 6:0).
Во следната рунда македонскиот тенисер беше сигурен против Ксавиер Сандерс од САД, славејќи со 2:0 (6:2, 6:2). Во четвртфиналето беше подобар од Џери Кустојоргос од Грција со убедливи 2:0 (6:0, 6:2), додека за пласман во финалето го победи Оливиер Крупа од Полска со 2:0 (6:1, 6:2).
На турнирот во Солун, покрај Алексовски, од македонските тенисери настапија и Александар Грујиќ, кој стигна до четвртфинале во конкуренција на двојки, како и Марин Стефановски и Алексеј Стојановски.
