Македонската ракометна јавност вечерва ќе биде насочена кон Битола, каде што Еурофарм Пелистер и Вардар 1961 ќе го одиграат големото дерби во рамки на второто коло од плеј-офот во Суперлигата. Натпреварот започнува во 19:00 часот, а салата во Битола е распродадена и се очекува жешка атмосфера.
Дуелот доаѓа во исклучително важен момент од сезоната. Пред почетокот на ова коло Вардар е лидер на табелата со 44 бодови, додека Еурофарм Пелистер е втор со 40 бодови. Токму затоа притисокот е на страната на битолчани – евентуален пораз би значел Вардар да се одлепи на шест бода предност, што значително би ја искомплицирало одбраната на шампионската титула за „пелистерци“.
Дополнителна неизвесност во борбата за врвот донесе и вчерашното реми меѓу Охрид и Алкалоид во „Билјанини извори“. По поделбата на бодовите, Охрид се израмни со Еурофарм Пелистер на 40 бодови на третото место, додека Алкалоид има 36 бодови и се наоѓа на четвртата позиција.
Двата големи ривали сезонава веќе покажаа колку се изедначени, откако во регуларниот дел од шампионатот секој тим успеа да слави на свој терен. Затоа и вечерашниот меч може да има огромно влијание врз текот на шампионската трка.
Вардар во Битола пристигнува со дополнителна самодоверба по европскиот успех и пласманот во четвртфиналето од Европската лига, додека Еурофарм Пелистер неодамна го заврши настапот во Лигата на шампионите. Според најавите, стручните штабови на двете екипи немаат поголеми проблеми со повредени ракометари, со тоа што кај домаќините под знак прашалник е настапот на Доминик Тајник.
Со оглед на важноста на бодовите и традиционалното ривалство, се очекува уште едно жестоко дерби кое може сериозно да ја насочи борбата за шампионската титула. Судии на натпреварот ќе бидат Ненад Николовски и Исмаил Металари.
