Македонската репрезентација до 17 години одигра без голови (0:0) против селекцијата на Грузија на првиот контролен натпревар одигран во Тбилиси.
Избраниците на селекторот Влатко Колев прикажаа дисциплинирана игра и беа блиску до победа во самиот финиш од средбата. Најголемата шанса Македонија ја имаше во 88. минута, кога по удар со глава на Андреј Цветковски, топката беше исфрлена од самата гол-линија од страна на домашните фудбалери, со што резултатот остана непроменет.
Во составот на Македонија настапија: Амин Суљовиќ, Тео Стојчевски, Филип Цветковски, Давид Лиотоски, Марко Мирчевски, Арда Иљазовски, Васко Папалиски, Андреј Цветковски, Мелдин Аломеровиќ, Самуел Вртковски и Грегоријан Михајловски. Шанса за настап добија и Даријан Денковски, Алекса Јазагиќ, Александар Петровски, Лука Јасмин Георгиев, Павел Миронски, Лука Кнезевиќ, Блерон Буши, Павел Рибарски и Ринор Цека.
Двете репрезентации утре ќе го одиграат и вториот контролен натпревар.
Овие средби се дел од подготовките на македонската селекција за настап во Елитната квалификациска рунда за пласман на Европското првенство. Македонија ќе игра во група со Германија, Франција и Словенија, а турнирот ќе се одигра кон крајот на март. Пласман на завршниот турнир ќе обезбеди само првопласираната репрезентација.
Завршницата на Европското првенство ќе се одржи во Естонија, во периодот од 25 мај до 7 јуни.
