Кратово вечерва забележаа неверојатна победа во последните минути над ланскиот прволигаш Црна Река од Кавадарци, славејќи со 2:1 преку пресврт во меч од 11. коло на Втората футсал лига.
Гостинот дојде до предност од 0:1 во 19. минута кога погоди Дарко Темелков за минимално водство на полувреме. Во вториот дел борбата продолжи, а двете екипи имаа шанси за погодоци, но без реализација.
Кога сите мислеа дека бодовите ќе заминат во Кавадарци, а Црна Река ќе продолжи да го следи чекорот на лидерот Железарец, Валентино Јовановски со два брзи гола во 38. и 39. минута го реши натпреварот.
Јовановски постигна два погодоци за комплетен пресврт и голем триумф на Кратово, со што го шокираше ланскиот прволигаш кој во две минути ги испушти трите бодови и влегува во комплицирана борба за враќање во елитата, од која испадна минатата сезона.
Ваквиот пораз на Црна Река најмногу во прилог му оди на лидерот Железарец, кој вечерва без проблеми со 1:8 славеше над „фенерџијата“ Карадаку.
Двојни стрелци беа Мартин Калчев, Дејан Кајсторовски и Петре Даиловски, а пак по еден гол постигнаа Реџеп Бислими и Спасе Здравевски. За домашниот тим единствен стрелец беше Шуајб Шукрија.
