Ракометната федерација на Македонија успешно ја реализираше својата нова станица од Ракометниот караван, кој денеска се одржа во спортската сала „Млаз“ во Богданци. Салата беше исполнета со насмевки, радост и позитивна енергија, а интересот беше поголем од очекуваното, со што овој караван се вбројува меѓу најмасовните досега.
Децата имаа можност преку три игри да ги направат своите први чекори во ракометот. Првата активност беше водење топка, потоа следуваше вртење околу половина терен, а третата – шут на гол, што предизвика најмногу возбуда и аплаузи. Преку овие активности, најмладите го почувствуваа спортот и се запознаа со неговите основи.
Настанот беше збогатен и со присуството на ракометните имиња Ристо Узунчев, Марија Гугуљанова и Лилјана Новоселска, кои со своето присуство им дадоа дополнителна мотивација на децата. Во рамки на караванот беа поделени и маички, што дополнително ја разубави атмосферата во салата „Млаз“.
Караванот, покрај Богданци, ги опфати и Дојран и Стојаково, обединувајќи ја младината од регионот околу ракометот како спорт и начин на живот.
Богданци уште еднаш потврди дека е еден од најракометните градови во Македонија. Во минатото РК Младост Богданци и ЖРК Млаз беа симбол на македонскиот и југословенскиот ракомет и препознатлив бренд во Европа.
Денес, РК Младост е непоразен лидер во Првата ракометна лига и чекори кон враќање во Суперлигата, а масовноста и ентузијазмот на најмладите даваат надеж дека и ЖРК Млаз повторно ќе се врати на ракометната мапа на Македонија.
Сликата од „Млаз“ беше јасна – ракометот во Богданци има иднина, а новите генерации веќе ја чувствуваат магијата на оваа игра.
