Четвртфиналниот натпревар од Купот на Македонија меѓу второлигашот Детонит Плачковица и прволигашот Силекс ќе се игра во Кратово, наместо во Радовиш.
Причината поради која овој натпревар се „сели“ од Радовиш во Кратово е поради тоа што Градскиот стадион во Радовиш нема услови за спроведување на ВАР технологија, односно оваа технологија воопшто не е имплементирана.
Според пропозициите за Купот на Македонија, ВАР технологијата се спроведува од четвртфиналето и од таа причина, натпреварот наместо во Радовиш ќе се одигра во Кратово.
„ФК Силекс ја известува јавноста дека натпреварот од четвртфиналето на Купот на Македонија против ФК Детонит Плачковица, кој е закажан за среда (25 февруари) со почеток во 14:00 часот, ќе се одигра на нашиот стадион во Кратово, наместо на „Градскиот стадион“ во Радовиш, како што беше првично планирано. Промената на локацијата е направена поради немање соодветни технички услови на Градскиот стадион во Радовиш“, велат од ФК Силекс.
Натпреварот од четвртфиналето на Купот на Македонија меѓу Силекс и Детонит Плачковица ќе се одигра на 25 февруари (среда) од 14 часот на стадионот „Силекс“ во Кратово.
