Македонските фудбалски судии добија ново големо признание од УЕФА, откако им беше доверено да ја делат правдата на дербито од осминафиналето во рамки на УЕФА Младинска Лига на шампиони меѓу Реал Мадрид и Челзи.
Главен судија на натпреварот ќе биде Игор Стојчевски, а ќе му асистираат Вјолца Изери и Филип Ицковски. Четврти судија на средбата ќе биде Алваро Родригез Ресио од Шпанија.
Првиот натпревар од осминафиналната пресметка е закажан за 25 февруари со почеток од 16 часот, а ќе се одигра на стадионот „Естадио Алфредо Ди Стефано“ во Мадрид.
Ова назначување претставува ново признание за македонските судии од страна на УЕФА. Нашите арбитри повторно добија доверба да судат на европската сцена, овојпат во рамки на младинската Лига на шампиони.
Ангажманот на Стојчевски и неговите асистенти Изеири и Ицковски е уште една потврда за континуитетот и угледот што македонските судии го уживаат во европските фудбалски кругови, како и доказ дека Македонија продолжува да продуцира кадар кој успешно одговара на највисоките европски стандарди.
