Ракометниот клуб Кичево ќе се „пресели“ во Охрид, каде во СРЦ „Билјанини Извори“ ќе ги игра домашните натпревари, додека се создадат услови клубот да се врати и домашните натпревари да ги игра во својата сала „Христо Узунов“ во Кичево.
Поради обилните врнежи од дожд Кичево беше силно погоден од поплавите, по што спортската сала „Христо Узунов“ беше претворена во пункт каде се сместени погодени семејства од поплавите и истите ќе бидат сместени во салата додека не се создадат нормални услови за да се вратат во своите домови.
Додека салата биде вратена во функција за спортски натпревари, РК Кичево своите домашни натпревари ќе ги игра во охридската сала „Билјанини Извори“.
Одложениот меч меѓу Кичево и Вардар Неготино од 15. коло или првата пролетна рунда е закажан за среда од 20 часот во СРЦ „Билјанини Извори“.
“Голема благодарност до градоначалникот на Охрид, Кирил Пецаков и на управата на ГРК Охрид што несебично ни излегоа во пресрет за домашните натпревари да ги играме во Биљанини Извори”, велат од РК Кичево.
Со овој натпревар ќе се комплетира првата пролетна рунда во Првата ракометна лига.
