Спортот е мост, инклузијата е сила – под оваа порака беше потпишан Меморандум за соработка меѓу Федерацијата на училишен спорт на Македонија и Специјална олимпијада Македонија. Со документот се отвора ново поглавје во развојот на училишниот спорт, во кое еднаквоста и пристапот за сите деца стануваат приоритет.
Меморандумот го потпишаа претседателката на Федерацијата на училишен спорт на Македонија, Елена Мицковска, и претседателката на Специјалната олимпијада на Македонија, Моника Бошковска – две жени, две лидерки, со една заедничка мисија: создавање спортска средина во која секое дете ќе има можност да учествува и да се развива.
Со овој чин, како што беше истакнато, не се потпишува само формален документ, туку се потврдуваат вредности. Се испраќа јасна порака дека сите деца имаат подеднакво право да бидат дел од училишниот спорт, дека инклузијата не е избор, туку обврска, и дека различностите не разделуваат, туку збогатуваат.
Преку соработката, двете организации ќе работат на создавање систем кој ќе овозможи активно учество на децата во спортски активности, поттикнување на другарството, личниот развој и градењето самодоверба – со цел секое дете да победи најпрво себеси.
Партнерството има за цел да ги зајакне позитивните вредности во спортот, фер-плејот, почитта и еднаквоста, поставувајќи силни темели за поинклузивен и поправеден училишен спорт во Македонија.
