Започна бараж-фазата за пласман на Светското ракометно првенство 2027, а вниманието во Македонија беше насочено кон пресметката меѓу Украина и Словачка – потенцијални ривали на нашата селекција во следната рунда.
Словачките ракометари остварија важна победа од 24-27 на гостински терен во германскиот Бенсхајм, правејќи голем чекор кон пласман во следната фаза. Уште на полувремето имаа солидна предност од 11-16, која успешно ја задржаа до самиот крај.
Украина настапи со ослабен состав, но и покрај тоа пружи отпор, предводена од Игор Турченко кој постигна дури 11 погодоци. Кај Словачка се издвои Бриатка со седум гола, додека значаен придонес дадоа и Потиск и Прокоп, а голманот Зернович имаше забележителни интервенции.
Реваншот ќе се одигра на 22 март во Повашка Бистрица, по што ќе биде познат противникот на Македонија во следниот квалификациски филтер за Мундијалот.
Во вториот натпревар од програмата, Грција го искористи домашниот терен и ја совлада Белгија со 29-26, обезбедувајќи предност пред реваншот. Николаос Лиапис кој го носи дресот на Охрид постигна два погодоци за грчката репрезентација.
