РК Вардар официјално ја потврди определбата да ја гради иднината со млади и перспективни ракометари, откако потпиша долгогодишен договор со Бобан Поповски – еден од најталентираните играчи во својата генерација, кој и покрај младата возраст веќе поседува значајно искуство и богата колекција на индивидуални и екипни успеси.
Поповски својата ракометна приказна ја започна во Преспа, а потоа следуваше важен развоен период во Алкалоид, каде настапуваше за кадетските и младинските селекции. Во актуелната сезона тој е дел од Мулти Есенс, каде има значајна улога во првата екипа во Првата лига, а истовремено е и стандарден член на младинскиот и кадетскиот состав.
На репрезентативно ниво, Поповски е кадетски и младински репрезентативец на Македонија, а особено се истакна на квалификациите за кадетското Европско првенство, каде беше најдобар стрелец, потврдувајќи го својот изразен голгетерски инстинкт и лидерски карактер.
Во досегашната кариера има освоено трофеи во Пионерската и Кадетската лига, а во 2024 година беше прогласен за МВП на Пионерскиот Ф4 турнир.
Дополнително, минатата сезона беше избран во Ол-стар тимот на кадетскиот Ф4, а во својата биографија веќе има и титула во Младинската лига, што јасно го потврдува неговиот континуиран напредок.
Со ангажманот на Бобан Поповски, Вардар добива млад, амбициозен и веќе докажан ракометар, кој претставува сериозна инвестиција за иднината на „црвено-црните“ и македонскиот ракомет.
