Пливачкиот клуб Струга оствари извонреден успех на меѓународниот пливачки натпревар „Santa Claus Talent Cup 2025“, кој се одржа на 28 декември во Скопје, во конкуренција на 40 клубови од Македонија, Србија, Албанија и Косово.
Стружани го завршија натпреварот со вкупно 33 освоени медали и четврто место во генералниот пласман, резултат кој уште еднаш го потврдува континуираниот квалитет и сериозната работа на клубот со младите категории.
Најуспешна поединка беше Сара Филева (2016) со дури седум медали, покажувајќи доминација во делфинските дисциплини, но и одлична разноврсност во слободно, грбно и мешано пливање. Одличен настап имаа и Ангела Филева, Деспина Чакар, Матеј Јолдески, како и повеќе пливачи кои се искачија на пиедесталот во различни возрасни категории.
Посебно радува фактот што голем број пливачи, покрај освоените медали, забележаа и подобрување на личните времиња, што е јасен показател за правилен тренажен процес и напредок. Настапите на младите надежи, како и стабилните резултати кај поискусните натпреварувачи, му донесоа на ПК Струга високо место во силна меѓународна конкуренција.
Со овој настап, ПК Струга уште еднаш испрати јасна порака дека е еден од најперспективните пливачки колективи во државата. 33 медали, бројни лични рекорди и четврта позиција од 40 клубови се резултат за респект и силен мотив за уште поголеми успеси во иднина.
