ЖРК Атлетик продолжува со јасната стратегија за стабилност и континуитет, откако клубот официјално потврди дека капитенот Матеа Чурлиновска го продолжи договорот до 2029 година. Со оваа одлука, раководството испраќа силна порака за доверба во една од клучните фигури на тимот и во иднината на клубот.
Чурлиновска, родена на 6 декември 2005 година во Прилеп, ракометниот пат го започна во ЖРК Деспина, каде што ги направи првите чекори во спортот. Потоа настапуваше за Куманово и Ѓорче Петров, за повторно да се врати во Деспина, од каде што минатата сезона се пресели во Атлетик. Со своите настапи и лидерски квалитети брзо се наметна како еден од столбовите на екипата.
Нејзиниот квалитет не остана незабележан ниту на репрезентативно ниво.
Во 2021 година Чурлиновска доби повик за кадетската селекција на Македонија, а истата година дебитираше и за сениорската репрезентација, каде што и денес е дел од националниот тим и со гордост ги брани боите на државата.
Продолжувањето на договорот со капитенот до 2029 година претставува уште еден значаен чекор за Атлетик во градењето на конкурентна и амбициозна екипа, со јасна визија за иднината и силно јадро составено од млади, но веќе докажани ракометарки.
