Женската фудбалска репрезентација на Македонија до 19 години престојува во спортскиот центар „Истатов“ во Дојран, каде што ја започна квалификациската кампања за Европското првенство на УЕФА во одличен стил.
Младите репрезентативки, предводени од искусниот стратег Кирил Изов, вчера ја совладаа Грузија со убедливи 3:0 во првото коло од квалификацискиот турнир (рунда 1, група Б5), што дополнително ја нагласи позитивната атмосфера и мотивот со кој работат.
Во рамките на нивниот престој, репрезентацијата денес беше свечено пречекана во просториите на Општина Дојран од градоначалникот Илија Тентов.
Состанокот помина во исклучително позитивна и конструктивна атмосфера, а градоначалникот се пофали со зрелоста, професионализмот и енергијата на младите фудбалерки.
„Во просториите на Општина Дојран денес ја имав исклучителната чест да ја пречекам женската У19 репрезентација на Република Македонија. Овој пријатен и содржаен спортски состанок отвори можност за подетална размена на мислења, идеи и искуства со младите репрезентативки до 19 годишна возраст, кои достоинствено ја претставуваат нашата држава на меѓународната спортска фудбалска сцена. Разговаравме за нивниот развоен пат, тековните подготовки, плановите за претстојните натпревари, како и за амбициите што ги мотивираат секојдневно да вложуваат труд, дисциплина и посветеност. Нивната зрелост, професионален пристап и нескриена љубов кон фудбалот се вистинска инспирација и потврда дека македонскиот спорт има светла иднина. Притоа, добив и посебен подарок – официјален дрес од У19 репрезентацијата на Македонија, кој со огромно задоволство ќе го носам секогаш кога ќе навивам за боите на Македонија. Тоа за мене претставува симбол на заедништво, поддршка и почит кон сите млади спортистки и спортисти што со срце и труд се борат за успех во сите спортови во кои Македонија се натпреварува. На репрезентацијата ѝ посакувам континуирани успеси, здравје, мотивација и многу спортски фудбалски победи. Нивната енергија и стремеж се охрабрувачки пример за сите млади генерации кои чекорат по патот на спортот. Општина Дојран и понатаму ќе остане отворена за поддршка на спортот, младите таленти и сите иницијативи што придонесуваат за развој на локалната заедница и промоција на нашите национални вредности. Горди сме на вашите успеси – продолжете да блескате на спортските терени и да ја носите Македонија во срцето“, изјава од градоначалникот на општина Дојран, Илија Тентов.
По убедливата победа над Грузија, младите фудбалерки го насочуваат вниманието кон второто коло, каде на 28 ноември во 12:00 часот на стадионот „Младост“ во Струмица ќе се соочат со Азербејџан.
Со ваква поддршка, атмосфера и мотивација – Македонија У19 влегува уверено во борба за пласман во следната рунда и продолжување на успешната приказна.
