Фудбалската репрезентација на Македонија до 17 години денес имаше интензивни подготовки за утрешниот прв предизвик против репрезентацијата на Унгарија.
Натпреварот е закажан за во 10 часот наутро по македонско време, а репрезентативците на селекторот Иљами Исејни денес ги одработија последните подготовки пред утрешниот прв натпревар.
Спортска Мрежа ексклузивни низ кратки видео секвенции ви носи дел од тренингот на нашата репрезентација на турско тло.
Македонија покрај со Унгарија ќе гира и со Сан Марино и домаќинот Турција, а целта е пласман меѓу првите две репрезентации во групата и обезбедување место во Лига А од втората квалификациска рунда.
По Унгарија ќе следува мечот со Сан Марино кој ќе се игра на 14 ноември од 10 часот, а пак последниот натпревар ќе биде против Турција од 12 часот закажан за 17 ноември.
Според квалификацискиот формат на УЕФА за Европското првенство до 17 години, двете првопласирани репрезентации од секоја група ќе обезбедат пласман во втората квалификациска рунда – Лига А. Останатите две селекции, односно третопласираната и четвртопласираната репрезентација, ќе продолжат во Лига Б.
Во втората квалификациска рунда, која ќе се игра во пролетта 2027 година, 28-те репрезентации во Лига А ќе бидат поделени во седум групи. Победниците на групите ќе обезбедат пласман на завршниот турнир на Европското првенство, каде што ќе им се приклучат домаќините Летонија. Завршниот турнир на УЕФА Европското првенство за репрезентации до 17 години е предвиден за периодот од 24 мај до 6 јуни 2027 година.
