Екипата на Охрид, денес во 18 часот, во Градишка ќе го одигра реваншот од 3. коло во Купот на ЕХФ против Слога Добој. По убедливата победа од 37-19 на домашен терен, охриѓани заминуваат со комотна предност од 18 голови, но нема простор за потценување.
Асистентот на Борис Ројевиќ, Наум Бабачев, истакна дека екипата пристапува максимално сериозно кон реваншот. Дури и со големата резултатска предност, направени се видео анализи, одредени играчи добија одмор за наредните натпревари, а вниманието веќе е насочено и кон дуелот со Вардар, следниот викенд.
„По пристигнувањето на екипата во Добој, направени се видео анализи..и покрај големата разлика на голови од првиот меч, сепак дојдовме тука со сериозен пристап да го одиграме и овој натпревар. Исто така, морам да споменам дека има и освежување во екипата, одредени играчи добија одмор бидејќи после овој, ни следат сериозни натпревари. Притоа го најавувам натпреварот со Вардар, следниот викенд во спортската сала ,,Билјанини Извори”, на којшто се надевам дека ќе извлечеме позитивен резултат.“- изјави Бабачев.
Реваншот меѓу Охрид и Слога Добој се игра денес во 18:00 часот во Градишка, а македонскиот тим ќе настапи со комотна предност од 18 голови, но со максимално сериозен пристап за да го потврди пласманот во следната рунда на Купот на ЕХФ.
