Со скоро комплетен ростер и голем ентузијазам, ракометарите на Еурофарм Пелистер се подготвуваат за вториот натпревар со унгарскиот гигант ПИК Сегед во Лигата на шампионите, кој ќе се одигра на 20.11.2025 (четврток) со почеток во 18:45 часот во „Pick Aréna“ во Сегед. Пред патот за Унгарија, дефанзивецот Илија Абутовиќ зборуваше за моменталната форма на тимот и очекувањата за предизвиците што ги чекаат.
Абутовиќ потенцира дека тимот постепено ја кревал формата и речиси целиот ростер е комплетен. Иако дуелот на гости со ПИК Сегед ќе биде потешок, тој нагласува дека тимот е подготвен за борба и дека новиот тренер донел нова филозофија што ја подобрува играта на екипата.
„Може да кажеме дека ја креваме формата и се радуваме што скоро целиот ростер сега е комплетен. Ја забележавме можеби досега најголемата победа во елитното натпреварување. Секој играч е важен за нас и знаеме дека можеме да се носиме со сите ривали. Играме со ПИК Сегед двапати во седум дена, но сега ќе биде потешко затоа што играме на гости, а и тие очекувам да имаат многу посериозен пристап кон нас. Ги изненадивме во Битола и сигурно нема да одиме кај нив со бело знаме. Периодот на адаптација е готов, со новиот тренер добивме нова филозофија, ги сфативме сите комбинации и направивме добра анализа на сработеното. Чекориме во нагорна линија, затоа се надевам дека ќе играме подобро и подобро. Во следните триесет дена имаме многу важни натпревари.“- изјави Абутовиќ.
Еурофарм Пелистер заминува во Унгарија со јасна цел – да се бори до последен момент и да го покаже својот максимум против ПИК Сегед. Како што истакнува Илија Абутовиќ, тимот чекори во нагорна линија и секој натпревар е можност за уште подобра игра.
