Фудбалската федерација на Македонија вложува во унапредување на својата инфраструктура, а овие денови стартуваше реконструкцијата на првиот терен во тренинг центарот „Петар Милошевски“ во Скопје.
На овој терен ќе биде поставена целосно нова тревна подлога со современ систем за дренажа, со што ќе се создадат многу подобри услови за работа на националните селекции и младинските категории. Дополнително, федерацијата веќе уреди нов паркинг простор и го олесни пристапот до трибините на вториот терен зад главната зграда на ФФМ.
Претседателот на ФФМ, Масар Омерагиќ, преку видео објава на социјалните мрежи го најави проектот и истакна дека обновата е дел од пошироката стратегија за создавање современи услови за развој на македонскиот фудбал.
Тренинг центарот „Петар Милошевски“ е база за подготовка на сите репрезентативни селекции и важи за едно од клучните места каде што се гради иднината на македонските фудбалери.
