Ракометниот клуб Охрид влегува во продолжението од сезоната со промени во играчкиот кадар. Дел од интернационалците, веќе нема да бидат дел од тимот на пролет, а клубот веќе ја редефинира ротацијата на бековските позиции.
Една од промените е заминувањето на српскиот интернационалец Младен Крсманчиќ, со кого не е продолжена соработката. Информацијата е потврдена од охридскиот клуб, а ракометарот, кој пристигна на почетокот од сезоната од Вардар, не успеа да се избори за поголема минутажа кај тренерот Борис Ројевиќ.
Според најавите, Крсманчиќ ќе ја продолжи кариерата во Србија, каде се очекува да стане нов член на вицешампионот Војводина. Таму би требало да ја пополни празнината која ќе остане по заминувањето на Стефан Додиќ во унгарски Веспрем.
Во меѓувреме, охриѓани веќе се разделија и со левиот бек Теимураз Орјоникидзе, со кого договорот беше спогодбено раскинат. Така, во плејмејкерската линија како главна опција останува словенечкиот интернационалец Тилен Стрмљан, додека хрватскиот ракометар Ловро Јотиќ во моментов е надвор од теренот, поради повреда.
Охрид продолжува со корекција на ростерот во склад со амбициите за вториот дел од сезоната, а во наредниот период се очекува клубот дополнително да ја заокружи играчката слика за настапите во Супер лигата и европските предизвици.
