Македонската тенисерка Лина Ѓорческа направи големо изненадување на стартот на силниот ВТА турнир W125 Самсун Опен, откако денеска во првото коло ја надигра поранешната светска број 1, Каролина Плишкова од Чешка, со 2-0 во сетови (6:4, 6:3) за 75 минути игра.
Плишкова, која во кариерата поминала осум недели на врвот на ВТА ранг-листата и двапати се пласирала во финалето на Грен слем турнирите (Вимблдон и УС Опен), денеска немаше одговор на сигурната игра на Ѓорческа.
Во првиот сет, Плишкова поведе со брејк и резултат 4:2, но Ѓорческа направи серија од четири гема со два брејка за да го заврши сетот со 6:4. Во вториот сет, единствениот брејк Лина го направи во четвртиот гем, по 14 одиграни поени, за предноста од брејкот да ја задржи до крајот и да го добие сетот со 6:3.
Во второто коло, Ѓорческа ќе се соочи со Белгинката Софија Костулас, која денеска со 2-0 (7:6(1), 6:4) ја победи Полјачката Вероника Фалковска.
Покрај тоа, Ѓорческа денеска ќе има уште еден меч во конкуренција на двојки. Заедно со Чагла Бујуякчај од Турција треба да го завршат натпреварот од првото коло против словенечките тенисерки Далила Јакупович и Ника Радишич. Словенечкиот дуел моментално води со 1-0 во сетови, а во вториот сет резултатот е 1:1, откако мечот беше прекинат поради дожд.
