Македонскиот второлигаш Беласица од Струмица продолжува да ја воодушевува својата бројна публика и верните навивачи. Од денес (01.10.2025) во продажба се ставени официјалните ЈАКО дресови на клубот, достапни за сите љубители и навивачи кои сакаат да бидат уште поблиску до својот омилен тим.
Дресовите во препознатливата плава комбинација, во која настапува Беласица, можат да се нарачаат на телефонскиот број 075/314-909, а цената со принт изнесува 2000 денари.
Ова е уште една позитивна информација за навивачите, откако клубот претходно објави дека сите есенски домашни натпревари ќе се играат во вечерен термин под рефлектори – што го прави Беласица единствен второлигаш со ваква практика.
По шест кола во Втората лига, струмичани го делат врвот на табелата заедно со Брегалница, двете екипи имат по 16 бодови. Со амбициозните настапи на терен, вечерната атмосфера и новите дресови за фановите, Беласица испраќа јасна порака – клубот е решен да ја врати старата страст и препознатливата енергија на стадионот „Благој Истатов“.
