Македонската тенисерка Лина Ѓорческа ја продолжи позитивната серија и обезбеди нов триумф на турнирот W75 во Куршумлијска Бања. Во првото коло таа ја совлада Американката Ели Шоп со 2-0 во сетови (6:4, 7:6(2)) по два часа и 15 минути игра. Во следната рунда Ѓорческа ќе се соочи со Русинката Анастасија Золотарева.
Натпреварот со квалификантката Шоп беше неизвесен и во двата сета. Во првиот сет резултатот по шест гема беше израмнет (3:3), но Ѓорческа направи клучен брејк во седмиот гем, поведе со 4:3 и со сигурна игра успеа да го добие сетот со 6:4, искористувајќи ја четвртата сет-топка.
Вториот сет започна подобро за Американката, која поведе со 2:0 благодарение на раниот брејк. Сепак, македонската тенисерка веднаш возврати и израмни на 2:2. До крајот на сетот двете ривалки беа изедначени, па победничката се решаваше во тај-брејк. Таму Ѓорческа покажа голема сигурност, брзо поведе со 6:1 и на крајот ја завери победата со 7:6(2).
