Во прес салата на стадионот „Петар Милошевски“ во Битола, вчера претставници на Општинскиот фудбалски сојуз (ОФС) Битола им ги доделија фудбалските топки на клубовите од Општинската лига во Битола и од Трета лига – Југозапад со седиште во Битола.
Вкупно 35 екипи ги подигнаа донациите од Фудбалската федерација на Македонија (ФФМ), од кои секој клуб од ОФЛ Битола доби по 10 топки, а екипите од Трета лига – Југозапад по 20.
Секретарот на Третата лига Југозапад, Васко Бошевски, во името на клубовите и ОФС Битола ја изрази благодарноста до ФФМ за поддршката и нагласи дека оваа соработка ќе продолжи и во иднина на уште повисоко ниво.
Со оваа донација, ФФМ уште еднаш потврди дека посветува внимание и на нисколигашкиот фудбал, помагајќи им на клубовите во подготовките за претстојната сезона.
