Пред неколку дена Македонија беше сведок на најголемиот ММА спектакл – Арммадa 14. Во незаборавна атмосфера пред домашната публика, нашите борци испишаа ново поглавје во македонската ММА историја.
Двајцата македонски репрезентативци, Даниела Алексовска и Марко Трајановски, вечерта ја крунисаа со големи победи и покажаа дека Македонија има борци со кои може да се гордее.
Алексовска ја воодушеви арената со сензационална победа уште во првата рунда. Со маестрален арбар ја совлада својата противничка Флацеа Алда од Молдавија. Во последната минута од воведната рунда, таа успеа да ја фати во одличен зафат, од кој Алда немаше излез.
Во машка конкуренција Марко Трајановски стигна до својата прва полупрофесионална победа со убедлива судиска одлука против Петар Кликовац од Србија. По три целосни рунди во кои Трајановски ја контролираше акцијата и беше доминантен во кафезот, судиите ја доделија заслужената победа на македонскиот борец.
Даниела Алексовска веќе активно се подготвува за Светското ММА Првенство во Тбилиси, Грузија, кое ќе се одржи на 27 септември, каде повторно ќе има можност да ја претставува Македонија на највисоко ниво. Македонија е горда што има вакви таленти кои нашата држава ја претставуваат на високо ниво.
