Екипата на Македонија Ѓ.П. дојде до својата втора победа сезонава, совладувајќи ја АП Брера со 2:0 на домашен терен во рамки на 6. коло од Првата македонска фудбалска лига. „Лавовите“ имаа доминација од самиот почеток, а резултатот го отворија во 17. минута преку Симеон Христов по асистенција на Клинтон. Иако продолжија со нападите, првиот дел заврши минимално 1:0.
Во второто полувреме Брера се обиде да се врати во игра, но исклучувањето на Хасан во 53. минута ја отежна нивната задача. Македонија Ѓ.П. ја искористи бројчаната предност и во 72. минута преку Мартин Талаков ја завери победата со погодок за 2:0. Со овој триумф скопскиот тим стигна до шестиот бод во првенството, додека Брера остана со пет.
Во Куманово, пак, Башкими ја прекина серијата од пет победи на Силекс, славејќи со 2:1 иако повеќе од половина час играше со играч помалку. Домаќините поведоа во 21. минута со голот на Аворнио, а во 53. минута Алексовски зголеми на 2:0.
Фисник Зука во 60. минута доби втор жолт картон и беше исклучен, што Силекс веднаш го искористи за да намали на 2:1 преку Пирес. Гостите до крајот имаа уште неколку добри шанси за израмнување, но голманот Јашар и слабата реализација не дозволија промена на резултатот.
Со овој триумф Башкими ја запиша втората победа на домашен терен, додека Силекс претрпе прв пораз по пет успешни натпревари. Во следното коло Башкими гостува кај Пелистер, а Силекс ќе ја пречека Струга Трим Лум.
