Македонскиот ракометен првак Еурофарм Пелистер се подготвува за вториот натпревар од новата сезона во Лигата на шампионите, каде што ќе гостува кај францускиот шампион Пари Сен Жермен.
Тренерот на битолскиот тим, Рубен Гарабаја, пред натпреварот истакна дека очекува сериозен предизвик против еден од најквалитетните состави во Европа.
„Мораме да се фокусираме на самите себеси, за да напредуваме секојдневно. Треба да се фокусираме на добрите страни на ПСЖ и да го дадеме најдоброто од себе. Ќе се обидеме да бидеме ефективни и ништо да не му биде лесно на ривалот. ПСЖ има супер-тим, со супер-ракометари и одличен тренер. Добро е што играме со нив на почетокот на сезоната, бидејќи тие секојдневно ќе напредуваат“, изјави Гарабаја.
Тој додаде дека иако екипата ќе биде без својата публика во Париз, поддршката од навивачите секогаш се чувствува:
„Во Париз нема да ги имаме нашите навивачи, нашиот осми играч, но сигурно ќе ја почувствуваме нивната поддршка“, порача стратегот на Еурофарм Пелистер.
Натпреварот ќе се одигра во салата „Пјер Де Кубертен“ со почеток во 20:45 часот.
