Македонскиот ракометен шампион Еурофарм Пелистер се подготвува за вториот предизвик во Лигата на шампионите – тешко гостување кај францускиот гигант – ПСЖ.
Голманот Никола Митревски изрази оптимизам пред натпреварот, истакнувајќи дека тимот има висока самодоверба по значајните победи над Вардар и Загреб. Според него, екипата патува во Париз без голем притисок, но со јасна цел – да се прикаже квалитетна игра и да се даде максимумот на теренот.
,, Било каков и да е ПСЖ, се работи за гигантот во спортот и во ракометот. Можеби имаат и најголем буџет во Лигата на шампионите оваа сезона. Ние се подготвуваме гледајќи на самите себе, имаме своја тактика. Подобро е кога се победува, се зголемува самодовербата на играчите, расте психичкиот момент кај секој играч и добро е што ги победивме Вардар 1961 и Загреб и освоивме два бода во ЛШ. Одиме малку порастеретени на гостински терен во Париз. Било која победа или бод освоен во гости добро ќе ни дојде. Не треба уште отсега да правиме калкулации, туку да мислиме натпревар по натпревар. Треба да ја играме својата игра, па што биде – нека биде. “ – изјави Митревски.
Натпреварот меѓу ПСЖ и Еурофарм Пелистер ќе се игра во четврток, во салата „Пјер Де Кубертен“ со почеток во 20:45 часот.
