Македонскиот репрезентативец 31-годишниот Бобан Николов повторно ќе го облече дресот на Констанца – клуб кој се смета за наследник на познатата Академија Хаџи, местото каде што ги направи своите први чекори во интернационалниот фудбал.
По цели 12 години, Николов се враќа „дома“ и потпиша двегодишен договор со романскиот клуб. По разделбата со Борац Бања Лука ова лето, тој ја избра Романија како своја следна дестинација – земја во која остави длабок печат со настапите за неколку клубови, меѓу кои и славната Стеауа (ФЦСБ).
Неговата богата кариера започна во Вардар, а потоа продолжи во унгарскиот МОЛ Фехервар, па повторно во Романија, Лече (Италија) и Босна и Херцеговина. Со искуство собрано на повеќе европски терени, Николов ќе биде значајно засилување за амбициозниот состав на Констанца.
