Фудбалскиот клуб Далбеговци, основан во 2023 година, за кратко време стана едно од најинтересните имиња во битолскиот фудбал. По успешната прва сезона и историскиот пласман од Петтата во Четвртата МФЛ, односно А-лигата Битола, клубот предводен од претседателот Ицо Стевановски најавува уште поголеми амбиции.
Во преодниот рок беа донесени сериозни засилувања – Николче Петрески од Светлост Кукуречани, голманот Николче Јовановски, Кристијан Тасевски од Младост Дедебалци, Кико Радојчик од Младост Горно Оризари, Николче Блажевски од Лисолај и Николче Ристевски од Питу Гули, како и Стефан Камбуровски. Со тоа, Далбеговци добива поголема широчина во ростерот и зголемена конкуренција на повеќе позиции.
Клубот успеа да ги задржи и клучните играчи од минатата сезона – Кико Наумовски, херојот од баражот, специјалистот за прекини Николче Петковски, капитенот и столб на одбраната Јове Каревски, како и Никола Стојовски кој се враќа по едногодишна пауза. Дополнително, тимот ќе добие свежина и од неколку млади таленти на само 16 години, кои се гледаат како иднина на клубот.
„Ова е прво наше учество во А-лигата Битола и со ваков состав, со борба и сложност, очекуваме голем успех. Позитивно е тоа што немавме многу заминувања, си отидоа само голманот Михаил Јошевски и Никола Митровски, но затоа успеавме да се засилиме со поквалитетни фудбалери,“ изјави претседателот Ицо Стевановски.
ФК Далбеговци за многу кратко време ја освои симпатијата на љубителите на фудбалот во Битола, а сега следи ново поглавје во кое клубот ќе се обиде да ја продолжи успешната приказна и да покаже дека е подготвен за поголеми предизвици.
