Фудбалскиот клуб Шкупи доби значајно засилување во офанзивната линија со ангажманот на искусниот напаѓач Марио Станковски. Поранешниот играч на Работнички и Македонија Ѓорче Петров официјално е претставен како нов фудбалер на чаирскиот прволигаш и ќе биде еден од носителите на играта во тековната сезона.
Станковски, кој има 27 години, е дете на Работнички, клуб во кој ги направи своите први фудбалски чекори и ја носеше капитенската лента. Во својата кариера настапуваше и за Саса, Гостивар, Борец, Тиквеш, Тетекс, како и за Триглав од Словенија, каде што помина една полусезона во 2023 година.
Тој е син на поранешниот македонски репрезентативец Горан Станковски, кој остави длабока трага во домашниот фудбал, а семејната традиција продолжува и со неговиот брат Лука Станковски, кој неодамна го постигна својот прв гол за македонската репрезентација.
Шкупи, кој се соочува со турбулентна сезона и големи организациски предизвици, очекува токму искуството на Станковски да донесе стабилност и офанзивна сила во борбата за задржување на прволигашкиот статус.
