Фит Фан Волеј ќе биде единствениот македонски претставник на Балканскиот клупски куп – БВА купот 2025, кој оваа година ќе се одржи во Гњилане, Косово. Натпреварите ќе се играат од 25 до 28 септември во салата „Мајка Тереза“.
Македонскиот клуб ќе се натпреварува во група со грчкиот АЕК, црногорскиот Херцег Нови и домаќинот Дрита. Победникот од турнирот ќе обезбеди директно учество во ЦЕВ Челинџ купот, а четирите екипи ќе играат по системот „секој со секого“.
Фит Фан Волеј го отвора настапот на 25 септември (17:30 ч.) против АЕК Атина. Веќе следниот ден, на 26 септември (20:00 ч.), ќе се сретне со домаќинот Дрита. На 27 септември е закажан слободен ден за сите екипи, а во последното коло на 28 септември (17:30 ч.) македонската екипа ќе игра против Херцег Нови.
Минатата сезона Фит Фан Волеј ја заврши на четвртата позиција во Првата лига и избори полуфинале во Купот на ОФМ 2025 – што беше една од најуспешните години во историјата на клубот. Сега, со настапот на БВА купот, клубот има шанса да направи чекор напред и да се претстави на меѓународната сцена.
