ЖФК Вардар продолжува со создавање на конкурентен состав за својата прва историска сезона во Првата женска фудбалска лига. Клубот од Скопје денес го претстави своето најново двојно интернационално засилување од Црна Гора – Анџела Савовиќ и Јелена Радевиќ.
21-годишната Савовиќ, која игра на позицијата лево крило, е позната по својата брзина, експлозивност и креативност во нападот. Со нејзината енергија, Вардар добива играчка која може да прави разлика во офанзивата и да донесе дополнителна свежина во напаѓачката линија.
Одбраната, пак, ја засилува 19-годишната Јелена Радевиќ, искусна штоперка која важи за цврста и сигурна играчка. Со својата стабилност, лидерство и добар тајминг во дуелите, таа ќе биде клучен дел од дефанзивната структура на тимот.
Со овие трансфери, црвено-црните ја заокружуваат стратегијата за засилување на сите линии во составот. Претходно, Вардар веќе промовираше уште три нови имиња – Јована Најдановиќ од Србија, Љубица Асановиќ од ЖФК Истатов и Александра Јовановска од ЖФК Љуботен – за што Спортска Мрежа веќе најави и објави детали.
Со пет нови засилувања и комбинација од младост и искуство, ЖФК Вардар влегува во сезоната со големи амбиции и јасна цел – да биде сериозен конкурент уште во својата дебитантска година.
