Екипата на Новаци е во следната фаза од Купот на Македонија односно во осминафиналето, откако денес во Петровец со убедливи 0:3 славеше над третолигашот Пчиња.
Второлигашот Новаци беше фаворит на овој натпревар и повеќе од јасно беше дека ќе обезбеди следна фаза од Купот на Македонија, а тоа го потврди и резултатски откако ја оправда фаворитската улога.
Новаци резултатот го отвори во судиското надополнување на првиот дел кога новото засилување Антонио Марцевски постигна гол за 0:1 на полувреме.
Во вториот дел брзо дојде Новаци до двојна предност откако исто така новиот играч Стефан Каревски постигна гол во 67. минута за 0:2, а во 85. минута со втор гол Каревски ги постави конечните 0:3.
Пелистер преку пресврт славеше над второлигашот Тетекс во Јегуновце со 1:2 и со тоа битолскиот прволигаш е во следната фаза од Купот на Македонија.
Даниел Николовски во 35. минута постигна гол за 1:0 на полувреме. Стартот од вториот дел донесе израмнување со голот на Христијан Стојановски во 52. минута.
Во 65. минута Пелистер доби пенал, но истиот не го реализираше Петар Ристиќ. Во самиот финиш од мечот во 85. минута искусниот Стефан Спировски погоди за конечни 1:2.
Тоа значи дека Пелистер и Новаци се чекираат во осминафиналето од Купот на Македонија каде беше се чекираат Детонит Плачковица, Шкендија Арачиново, Работнички, Охрид, Силекс, Брегалница, Македонија ЃП и Беласица.
Следната недела четвртолигашот Јени Маале ќе игра со Шкендија, Кожуф со Шкупи, Победа против Башкими и Скопје со Тиквеш за комплетирање на првата фаза од Купот на Македонија.
