На 13 односно 14 септември ќе започне новата сезона во Третата македонска фудбалска лига – Север со 14 екипи. Во новата сезона ќе има четири нови екипи, тоа се Беса Сарај, Студеничани, Отља и екипата на Лопате.
Познати се и двојките за првото коло односно познат е целиот распоред за стартот во новата сезона.
Во рамки на првото коло Куманово на домашен терен ќе игра против новиот третолигаш Беса од Сарај, Пчиња на домашен терен ќе игра против Беса од Слупчане.
Новиот третолигаш Студеничани ќе има навистина тежок предизвик во првото коло против фаворитот Еуромилк, а екс прволигашот од Горно Лисиче за новата сезона најавува амбиции за враќање во Втора лига.
Првото коло носи и дерби соочување на Фортуна и БВК Коњаре, а пак некогашниот второлигаш Кадино ќе игра против Ржаничино.
Новиот третолигаш Отља ќе биде домаќин на Аеродром, а пак Башкими Љуботен ќе го пречека новиот третолигаш Лопате.
Трета лига – Север дефинитивно е најсилниот третолигашки регион, каде борбата за титулата односно првото место и бараж за Втора лига, но и опстанокот е навистина тешка.
Како што е познато шампионот игра бараж за влез во Втора лига, а пак последните три екипи директно испаѓаат од Трета лига – Север во Општинската фудбалска лига (ОФЛ) каде што територијално припаѓаат.
