Екипата на Шкендија Арачиново, која има високи амбиции за пласман во врвот на Втората македонска фудбалска лига (ВМФЛ), донесе ново засилување во дефанзивната линија. Тимот го ангажира искусниот стопер Арсим Љамалари, кој пристигнува како слободен играч.
Љамалари, кој има 31 година, минатата сезона настапуваше за Беса Добри Дол, но по испаѓањето на тимот од прволигашката конкуренција реши да побара нов предизвик. Кратко време беше дел од Шкупи, но поради кризата во клубот го напушти Чаир и се приклучи на амбициозната екипа од Арачиново.
Во својата кариера Љамалари има настапувано и за Силекс, Маџари Солидарност, за Еуромилк ГЛ и Скопје на домашната сцена, како и за турските клубови Караман и Силифке, што го прави големо засилување за тимот на тренерот.
Шкендија Арачиново одлично ја започна новата сезона во ВМФЛ со две победи во две кола – најпрво во Ресен со убедливи 0:3 против Преспа, а потоа на домашен терен славеше со 2:1 против Охрид. Дополнително, во Купот на Македонија екипата обезбеди место во осминафиналето со победа над Каменица Саса.
Со доаѓањето на Љамалари, клубот ја зацврстува одбраната и ги потврдува своите сериозни амбиции за висок пласман оваа сезона.
