Охрид ќе игра во големото финале на Меморијалниот турнир „Крсте Андоновски“, а ќе ги одмери силите со македонскиот шампион Еурофарм Пелистер.
Охриѓани во последниот меч од групната фаза загубија од хрватскиот вицешампион Нексе со минимални 30:29, но поради подобрата гол разлика тимот на Борис Ројевиќ патува во големото финале.
Ракометарот на Охрид, Дејан Кукуловски во изјава за Спортска Мрежа вели дека противникот од Хрватска бил одличен тим, додава дека лошо го отвориле мечот, но се вратиле во текот на натпреварот.
„Знаевме каков натпревар нè очекува, знаевме за каков тим се работи. Екипата на Нексе е одличен тим, тие се вице-шампиони на Хрватска. Беше еден тежок натпревар, можеби на почетокот отворивме малку лошо, но ете, во вториот дел од натпреварот, полека се вративме и можеби не го добивме мечот, но си ја остваривме целта и сме во финалето“, вели Кукулоски за Спортска Мрежа.
Големото финале меѓу Охрид и Еурофарм Пелистер се игра утре во СЦ „Билјанини Извори“.
