Ракометниот клуб Младост 1977 од Богданци продолжува со амбициозната трансфер политика и официјално го претстави новото големо засилување за претстојната сезона – Жоао Габриел Диас Гекас, 23-годишен бразилски ракометар кој игра на позицијата пивотмен.
Корпулентниот играч, висок 193 сантиметри, е поранешен младински репрезентативец на Бразил и доаѓа од тимот на РК Сао Каетано, каде минатата сезона беше еден од најдобрите играчи во бразилската лига.
Со своето искуство и физичка подготвеност, Жоао Габриел се очекува да биде клучна алка во играта на Младост 1977 и еден од носителите на тимот на патот кон Суперлигата.
Овој трансфер следува по неуспешниот договор со белорускиот пивотмен Никита Соколов, но раководството на клубот веднаш реагираше и ангажираше квалитетна замена која треба да ја засили офанзивната и дефанзивната сила на екипата.
Со ангажманот на Жоао Габриел и претходните засилувања, РК Младост 1977 се наметнува како прв фаворит за влез во Суперлигата, со јасна цел да стане дел од ракометната елита на Македонија.
