Еден од најперспективните македонски фудбалски таленти, младинскиот репрезентативец Адмир Љатифи, кариерата ќе ја продолжи во хрватскиот прволигаш Осијек. Осумнаесетгодишниот офанзивец потпиша тригодишен договор со клубот и ќе го започне својот прв интернационален предизвик.
Љатифи, кој настапува на крилните позиции, а по потреба и зад напаѓачите, веќе има значително искуство и покрај младите години. Во Првата македонска фудбалска лига има забележано 41 настап со дресовите на Беса и Македонија Ѓорче Петров. Фудбалските почетоци ги имаше во школата на Њу Старс, а во редовите на „лавовите“ пристигна во 2022 година.
По распадот на Беса, младиот офанзивец пронајде нова средина во Хрватска, со што започнува неговата интернационална кариера.
Љатифи е стандарден член на македонската репрезентација до 19 години и се смета за едно од најголемите ветувања на мак-фудбалот.
