Струга Трим Лум со сигурни 2-0 го совлада повратникот во елитата Македонија ЃП, во првото коло од новата сезона во Првата македонска фудбалска лига.
Првиот дел мина мирно сè до самиот финиш, кога во 43. минута Компаоре ја затресе мрежата на гостите, но ВАР-интервенција го поништи голот поради игра со рака – прв ваков случај во мак-фудбалот.
Само две минути подоцна, во екстра-времето, Маудо Ламине Жарју со удар со глава по центаршут ја реализираше првата вистинска шанса за водство на стружани.
Во второто полувреме, домаќините ја контролираа играта, а Македонија ЃП можеше да израмни во 58. минута, но обидот на Дошев беше исчистен од казнениот простор.
Дилемата околу победникот ја реши Компаоре во 75. минута, по одлична асистенција на нововлезениот Христијан Малески.
Дебито во дресот на Струга го запиша и Кирјакос Мазоулоуксис – единствениот грчки фудбалер во ПМФЛ сезонава.
Струга со оваа победа ја започна сезоната според планот и најави дека повторно ќе биде меѓу фаворитите за висок пласман односно борба за титулата.
