Најтрофејниот македонски клуб Вардар со убедлива победа од 4-1 над големиот ривал Пелистер го отвори новиот шампионат во Првата македонска фудбалска лига. На Националната Арена „Тодор Проески“, пред повеќе од 5.000 гледачи и во врел дерби-амбиент со „Комити“ и „Чкембари“ на трибините, „црвено-црните“ ја демонстрираа својата надмоќ.
Херој на вечерта беше Димитар Данев, младински репрезентативец и ново засилување од Работнички, кој двапати ја тресеше мрежата на битолчани. Голот за водство (1-0) го постигна во судиското продолжение на првото полувреме, по одлична акција и асистенција на Азер Омерагиќ.
Вториот дел започна со мајсторија на Роџерс Мато, кој во 50. минута од работ на шеснаесетникот со прецизен удар зголеми на 2-0. Пелистер се врати во игра во 65. минута преку Лука Булатовиќ, кој со првиот допир по влезот во игра намали на 2-1.
Сепак, надежите на „зелено-белите“ ги згасна Данев, кој во 80. минута со лева нога ја погоди целта за 3-1, а конечните 4-1 ги постави Диего Кастенада во самиот финиш со ефектна завршница во мал простор.
Вардар со оваа победа најави дека е подготвен за уште една силна сезона, а Пелистер ќе мора брзо да ја залечи раната пред следните предизвици во ПМФЛ.
