Актуелниот македонски првак Шкендија триумфално ја отвори новата сезона во Првата македонска фудбалска лига, совладувајќи го Шкупи со убедливи 5-1 на Градскиот стадион во Тетово. Победата беше очекувана, со оглед на тоа што гостите од Чаир допатуваа во скратен состав – дури седум младинци беа во стартната постава, а на клупата седеа само четири резерви, од кои двајца голмани.
Шкендија офанзивно го отвори мечот и уште во 8. минута поведе преку Флорент Рамадани, кој со прецизен и силен удар од дваесетина метри го совлада Максимилијан Гроте. И покрај проблемите, Шкупи успеа да израмни во 14. минута преку Малик Хајвали, кој искористи невнимание во одбраната на домаќините. Но, надежите на гостите кратко траеја – само три минути подоцна Ендрит Рустеми доби втор жолт картон и го остави својот тим со играч помалку.
Веќе во 21. минута, Арлинд Зејнулаи повторно донесе водство за „црвено-црните“ по убаво проигрување од левата страна. До крајот на првиот дел, домаќините имаа уште неколку шанси, но резултатот остана 2-1.
Во второто полувреме, избраниците на Јетон Беќири целосно го контролираа мечот. Влезот на капитенот и најдобар стрелец во историјата на македонскиот фудбал, Бесарт Ибраими, донесе уште поголема закана за голот на Шкупи. Тој за само шест минути постигна два гола – во 70. и 76. минута – за убедливи 4-1. Крајниот резултат го постави Лиридон Љатифи во 83. минута, запечатувајќи го најубедливиот триумф на Шкендија против Шкупи во нивните 36 меѓусебни дуели.
Следен предизвик за Шкендија е реваншот од квалификациите за Лигата на шампионите против Карабах, додека во домашното првенство викендов ќе гостува кај Македонија ЃП. Шкупи, пак, во второто коло ќе го пречека Силекс.
